(کوردی) به‌شداری کۆمه‌ڵه‌ی مافی مرۆڤی کوردستانی ئێران- ژنێڤ (KMMK-G) له‌ پێنجهه‌مین سیمپۆزیۆمی سویس له‌ سه‌ر په‌نابه‌ران

 

به‌شداری  کۆمه‌ڵه‌ی مافی مرۆڤی کوردستانی ئێران- ژنێڤ (KMMKG)  له‌ پێنجهه‌مین سیمپۆزیۆمی سویس له‌ سه‌ر په‌نابه‌ران

 

پێنجه‌هه‌مین سیمپۆزیۆمی سویس (5th Swiss Symposium on Asylum) له‌ سه‌ر پرسی په‌نابه‌ران‌ له‌ لایه‌ن ئیداره‌ی په‌نابه‌رانی سویس (ODM)،  کومیساریای به‌رزی په‌نابه‌رانی ڕێکخراوی نه‌ته‌وه‌یه‌کگرتووه‌کان (UNHCR)، ڕێکخراوی په‌نابه‌رانی سویس (OSAR) و به‌ به‌شداری فه‌رمی کۆمه‌ڵه‌ی مافی مرۆڤی کوردستان له‌ رێکه‌وتی 30 و 31ی ژانویه‌ی 2013 له‌ پێته‌ختی سویس “برن” به‌ڕێوه‌ چوو.

ئامانجی سه‌ره‌کی سیمپۆزیۆمه‌که‌ که‌ 2 ڕۆژی خایاند تاوتوێکرندی پرسی په‌نابه‌ران بوو‌ و ده‌یان پسپۆرو کارناس، پارله‌مانتێر و ڕێکخراوی بواری قانوونی و پشتیوانی له‌ په‌نابه‌ران به‌شداربوون.

میوانی سه‌ره‌کی سیمپۆزیۆمه‌که‌‌ خاتوو “سیمۆنیتا سومارۆگا” وه‌زیری دادی سویس له‌ وتارێکی گرنگدا تیشکی خسته‌ سه‌ر هێندی خاڵی سه‌ره‌کی سیاسه‌تی نوێی وه‌زاره‌ته‌که‌ی له‌وانه‌ گرنگی ئینتیگراسیۆنی په‌نابه‌ران، خێراکردنی پرۆسه‌ی په‌نابه‌ری، به‌شداری ڕێکخراوه‌ مه‌ده‌نی یه‌کان له‌ داڕشتنی قانوونی نوێ، پشتیوانی له‌ په‌نابه‌رانی سوریه‌‌ و به‌رپه‌رچ دانه‌وه‌ی “ڕاسیسم” له‌ وڵاتی سویس.

له‌ په‌راوێزی کونفرانسه‌که‌دا، ڕێزدار ته‌یموور ئه‌لیاسی نوێنه‌ری کۆمه‌ڵه‌ی مافی مرۆڤی کوردستان له‌ گه‌ڵ خاتوو “سوزین پارک” سه‌رۆکی شاخه‌ی سویسی (UNHCR)، به‌ڕێز “ماریۆ گاتیکر” به‌رپرسی ئیداره‌ی په‌نابه‌رانی سویس و چه‌ندین که‌سایه‌تی به‌شدار له‌ کونفرانس دیداری پێکهێنا. ناوبراو له‌ دیداره‌کانیدا له‌ گه‌ڵ به‌رپرسانی ڕێکخراوو و ئیداره‌‌ په‌نابه‌ریه‌کان و ده‌وڵه‌تی یه‌کان، داوای له‌ به‌رچاوگرتنی تایبه‌تمه‌ندی پرسی په‌نابه‌رانی کوردی کرد.  هه‌روها ئیشاره‌ی به‌وه‌کرد که‌ له‌ پرۆژه‌کانیان بۆ په‌نابه‌رانی سوریه‌ له‌ وڵاتانی هاوسنووری سوریا، UNHCR و ODM نابێت په‌نابه‌رانی کوردستانی سوریا له‌ باشووری کوردستان له‌ بیربکه‌ن.

شایانی باسه‌‌ که‌ یه‌کێک له‌ ئامانجه‌کانی کۆمه‌ڵه‌ی مافی مرۆڤی کوردستان، پشتیوانی کردنی پرسی په‌نابه‌رانی کورده‌ له‌ وڵاتی سویس و ناوه‌نده‌ نێونه‌ته‌وه‌یه‌کاندا. کۆمه‌ڵه‌ی مافی مرۆڤی کوردستان‌ له‌ پرۆژه‌یه‌کی کومیساریای به‌رزی په‌نابه‌رانی ڕێکخراوی نه‌ته‌وه‌یه‌کگرتووه‌کان (UNHCR) که‌ له‌و کونفرانسه‌دا پێشکه‌شکرا له‌‌ ژێر ناوی ” ئالتێرناتیڤێکی دیکه‌ له‌ جیاتی ژیانی په‌نابه‌ران له‌ که‌مپه‌کانی په‌نابه‌ری” هاوکاری کردبوو.

کۆمه‌ڵه‌ی مافی مرۆڤی کوردستانی ئێران- ژنێڤ

31.01.2013

 

 

 

© Association pour les Droits Humains au Kurdistan d'Iran-Genève (KMMK-G) - Admin -